忙都要食好啲

琴日先講完上星期啲麻煩野冇收到客人回覆,所以琴日返工比較輕鬆,今朝起身出門口返工個陣都以為今日可以舒服少少,冇刻意睇公司email, 梳洗完就出門口食早餐,最近好似冇乜點食三文治,今日一於黎返份簡約早餐(因為覺得自己最近肥左,所以要控制一下體重),食完之後都係係餐廳外面坐低歎下咖啡,玩下手機抽下煙咁

今日天色唔係好對路,好似想落雨咁,琴日就論盡囉,收工個陣冇拎遮,搞到我沿途急急腳咁走去車站驚死會落雨.今日到公司第一時間放返把遮落書包先

開完電腦之後即刻見到幾封驚嚇email,原來客人星期一放假,所以琴日返工先冇收到佢回覆,今日返黎即刻收到啦,我又進入暴走狀態.因為知道有排忙.果然,老細返黎同我講,要考驗下我點處理呢封email,所以今次唔比tips我,要我自己搞掂...即係又要罰我作文囉...

結果我成朝都埋頭苦幹去寫論文咁寫,好在都趕得切食飯之前寫出,可以等我安心休息一個鐘.不過落樓之後又係天黑黑...我又係冇拎遮囉...於是又係急急腳咁走去餐廳,好在我同同事行得快,去到唔使等位,食完飯都係講緊1:20, 回程既時候見到天色越黎越暗,又要超急急腳咁走返去,有驚無險,係佢落狗屎之前返到去.

返到公司之後,同老細一齊翻查上一手同客人既email對話,終於整理好晒成個故事,而家道理係我地呢邊,應該好大機會可以要佢地落返之前cancel左既單.不過為左搞呢壇野,我地兩個足足坐係到搞左4個鐘,之後仲用左成個鐘度封email出黎將佢一軍.搞到我成7點幾先收得工.

收工之後,覺得今晚唔食返餐好野都對唔住自己,雖然今晚一支公,但無阻我想食好野既心情.今晚我一個人叫左個煙肉碎雜菌蝴蝶粉,再黎一份炸薯,雖然今日lunch已經食左一次炸薯條,但唔知點解今日勁想食薯條囉,所以就encore一份.醫飽完個肚之後,就非常滿足咁返歸,聽日繼續兵來將擋,唔信搞條粉腸唔掂