叫我做野冇反應,叫我食野好知醒 !

琴日其實唔算特別忙,本來我食完個靚早餐之後,返到公司都好hea,但腦細唔知抽起邊條筋,臨食飯之前個一個鐘突然為左啲無聊事捉左我入去,之後一傾就成個鐘.到遲左放lunch.

好在我阿頭仲未可以出去食飯,所以琴日都係一個人食,遲左都唔係咁大件事,一個人嘛,容易搵位啊.既然遲左出門,咁呢,琴日lunch既選擇只有一個: Stamp Cafe, 我發覺我一比我腦細捉住個陣,或者工作上遇到唔順心,lunch我就好鐘意自己一個人去呢到食飯. 除左貪佢夠靜之外,亦都因為我已經幫襯左佢十幾年,有種情意結.

所以每次黎食飯,我都覺得好relax, 琴日個兩塊雞扒就正囉,除左有我超鐘意既芝士咖喱汁之外,老細仲煎到兩塊雞扒卜卜脆.食落既香口又美味.食完之後真係要大叫一句,我充滿力量啦 !!

好啦,食完飯返去,我腦細搵左其他人開會,好在,下午我可以抖抖.下午我只需要處理另一個sales rep. 既白痴野,同比人捉住相比,簡直係小兒科啦.雖然對住啲白痴都會好嘔血,但總好過係腦細房成幾個鐘,係自己位做野點都輕鬆啲既.

琴日精神狀態唔係太好,所以即使唔係好忙,到收工個陣已經謝晒.所以我叫左阿媽煮飯,唔自己出去食啦.琴晚個餐簡單得黎不失高雅,有我媽子既靚靚煎豬扒,仲有鮑魚炒菜心(當然只係罐頭鮑啦),就咁睇起上黎都幾elegant架.除左賣相唔差之外,食落仲幾好味.所以話,無論幾攰都好,一講到吃,點都要食好啲先對得住自己.食完飯,陪老婆傾左陣就去訓,渡過完美既一日