媽子新玩具到(新家具)

週末話咁快又差唔多完,不過今個星期我過得非常充實,星期六拎左個新玩具比我大寶,玩左一日之後,到今日一早就起身食早餐,食完早餐之後就開工,開始安裝上星期係IKEA買既餐椅同電視架.

真係唔可以睇少呢五件野,睇落雖然好簡單,但原來安裝起上黎都幾花時間, 淨係4張餐椅都搞左我成兩個鐘. 電視架就仲麻煩, 除左要安裝之外,仲要裝本來放係電視櫃上面既野拎晒落黎抹塵,搞一舊野,連抹塵都用左兩個鐘,你話西唔西利.

雖然今日安裝5件小家具都用左我4個鐘,但見到自己做出黎既成品效果唔錯既時候,又真係好有滿足感.安裝完都成2點幾,專心做野個陣真係唔識肚餓,咁就當食少一餐減下肥.等6點先落去食dinner.

之前睇新聞見到,話疫情下,香港既藥房可以用世界末日黎形用,初時我以為只係啲遊客區好似旺角,尖沙咀呢啲地方既藥房會死姐,冇諗到連我地商場個間懶high class既藥房都咁快收擋,冇既,佢地當初個定位係做隔離豪宅既生意嘛,但疫情下,班友都返晒大陸,咁我地啲公屋既街坊又鐘意幫襯以前被領展趕走左個間藥房,情願過愛民村都唔幫襯呢間,咁佢想唔執都幾難既.只係冇諗過佢會咁快執姐.

如果商場入面一啲十幾年既鋪頭要執,我地呢啲街坊一般都會好唔捨得,覺得好可惜,不過呢間野開得先2年,仲要串柒柒咁,所以佢地執左我其實都冇乜感覺.一雞死一雞鳴姐,好快又有一間新藥房架啦.

八卦完又執一間藥房之後,就梗係做正經野,坐低食dinner, 我地由於早左落去,所以仲未過tea time 時段, 即係仲有特價餐, 咁就快快趣落單先啦,一陣過左鐘又收返我地正價.

我媽子今晚黎左個乾炒牛河,佢話自己唔識整呢味,一於叫呢個喎, 我就是是但但黎左個吉列豬扒水餃米線.講起米線,其實我地商場早半年開左間譚仔,不過呢,我就一次都冇去幫襯,因為我真係諗唔明點解一碗咁普通既米線要賣成50-60蚊,真係唔值囉.我呢到呢碗都係講緊41蚊,雖然唔係特別平,但好過你譚仔先吖.

食完飯,去supermarket 行個圈,買啲蛋糕同麵包,費事今晚肚餓冇野食.post完野休息下.聽日返公司再搏殺