Happy Reunion

數下手指,我公司個靚仔都冇做差唔多兩個月,我仲記得佢走之前我好鬼唔捨得,不過佢閃左人之後我都冇咁多時間傷感,因為要接手佢啲野,加上我地工廠呢兩個月甩期甩到阿媽都唔試得,每走一單貨都好似救火咁,所以呢兩個月感覺過得好快

琴晚靚仔message我話想我幫佢碌咭買打機啲道具(佢冇credit card, 所以一直都係我幫佢搞), 所以我就順便約佢今日食飯.一諗到係公司以外可以見下啲舊戰友,心情即刻好晒.

今朝唔係太肚餓,就是但隊個三文治算數,食完返去繼續救火,好在上午冇太多麻煩野,所以都可以順利吃飯

由於靚仔同我一樣都係好鐘意吃好野,同佢食飯唔可以太求其,咁就去比較中高檔路線個間eight station啦,佢地主打西餐,啱晒呢個係南美長大既靚仔.我以為佢會早到過我,所以去到餐廳見佢唔到個陣我都擔心佢知唔知我係講緊呢間.好在我坐低無耐佢就到左,如果要我去搵佢就搞笑囉.

我早兩日先同媽子吃完扒,所以今日就唔扒啦,不過我估靚仔一定會叫扒,不出所料,佢果然係要吃靚野.我就黎左個焗芝士黑松露risotto,今次我冇叫扒係啱既,呢個risotto睇落仲正過份扒.食落好重芝士味,如果個飯有海鮮或者肉就一流囉.

今日同佢食飯都有講下我地公司近況,佢聽完之後都搖晒頭,睇黎當初佢走佬唔玩係啱既,不過我就唔可以學佢咁型,話走就走啦,雖然我同公司啲同事比,都叫冇咁大負擔,我又未有小朋友,又唔使供數.但始終都唔細啦,唔可以咁任性,唯有頂硬上.

食完飯走人之前,梗係要幫靚仔做又緊要既野 - 買道具啦,呢條靚仔勁囉,玩一次game都要買幾千錢道具.果然係有錢人家.同佢買完架生,都差唔多要返去搏殺.今日見一見舊朋友,心情都好啲,下午做野都好有衝勁.所以今日好準時收工.再捱多兩日,又可以Happy Friday,加油